അശ്വതിയുടെ തിരഞ്ഞെടുത്ത കവിതകൾ - പ്രാണൻ

- പ്രാണൻ -

നിഗൂഢമായതെന്തും ഇഷ്ടം എന്ന കൗതുകത്തിനപ്പുറം ആരെയെങ്കിലുമത് മോഹിപ്പിക്കുന്നുണ്ടാവുമോ...

ഓടി ഒളിക്കാൻ വെമ്പൽ കൊള്ളുന്നവരും പടിവാതിലിൽ ഒരിത്തിരി അറച്ചു നിൽക്കുന്നുണ്ടാവില്ലേ...

ഒരു പിടി ചാരമായി മാറി ഈ മണ്ണിൽ അലിയുമ്പോഴും ഒരു നെടുവീർപ്പിലൊതുക്കി മറക്കും ഈ ലോകം എന്നെയെന്നോർക്കുമ്പോൾ മരിക്കാതിരുന്നെങ്കിൽ എന്ന് ആഗ്രഹി ക്കുന്നുണ്ടാവില്ലേ...

സ്വീകരണ മുറിയിലെ ചിരിക്കുന്ന ചിത്രമായി നിലകൊള്ളുവാനല്ലാതെ, അവിടെ അലയടിക്കുന്ന ആഹ്ലാദങ്ങളിൽ പങ്കു ചേരാനോ, അവിടെ തുളുമ്പുന്ന തേങ്ങലുകളിൽ ഒരിറ്റു കണ്ണീർ പൊഴിക്കുവാനോ കഴിയാത്ത മരണത്തിന്റെ നാളെകൾ അങ്ങകലങ്ങളിലായിരിക്കണേ എന്ന് പ്രാർത്ഥിക്കുന്നുണ്ടാവില്ലേ...